Skandali i grabitjes së pronave në Jalë, familja Koço fiton gjyqin me kompaninë Jala Investment e familjes Gjiknuri

Familja Koço ka fituar gjyqin me kompaninë Jala Investment të familjes Gjiknuri për pronën në vijën e parë të plazhit të Jalës, ku sipas projektit do të ndërtohej një hotel.

Kujtojmë se me anë të procedurave të paligjshme me legalizime të bëra brenda 24 orëve, Kompania “Jala Investment SHPK”, i mori familjes Koço pronën në zonën turistike të Jalës. Familja Koço denoncoi në gjykatë dhe prokurori grabitjen e pronës nga kompania e familjes Gjiknuri.

Prona i përkiste familjes Koço që e kishin të trashëguar që prej vitit 1990. Sipas vendimit të dhënë nga gjykata, punimet nga firma Jala Investment, me aksioner kryesor Andi Gjiknuri, janë pezulluar dhe është vendosur një sekuestro ndaj dokumentacionit të kësaj prone.

Prokuroria ka nisur hetim të thelluar për këtë çështje me akuzën e falsifikimit të dokumenteve të pronës.

Verdikti final për çështjen e pronës së familjes Koço pritet të jepet me datë 12 prill në gjykatën e Apelit të Vlorës. Trupi gjykues për çështjen e pronës së familjes Koço, kryesohet nga kryetarja e gjykatës së Apelit, Iliba Bezati.

Prona ka kaluar nga Lorenc Koljaka tek familjet Mëhilli dhe Dhespoti, të cilat pretendojnë se kanë një marrëveshje të nënshkruar me kompaninë “Jala Investment SHPK” për ndërtimin e një hoteli në atë truall.
Nëpërmjet një deklarate të publikuar, kompania “Jala Investment SHPK”, sqaron se nuk ka asnjë kontratë të firmosur me familjet Mëhilli dhe Dhespoti për ndërtimin e një hoteli në Jalë. Më tej në deklaratë theksohet se pronat e zotëruara nga kjo kompani janë pa barrë hipotekore dhe të blera nga pronarë të ligjshëm.

Në bazë të fakteve, rezulton të jetë e vërtetë që marrëdhëniet kontraktuale me familjet Mëhilli dhe Dhespoti për ndërtimin e hotelit në Jale buzë plazhit, nuk kanë qenë me “Jala Investment” por më kompaninë “Andi SHPK”që është aksionere kryesore dhe zotëron 60% të shoqrisë “Jala Investment SHPK”.
Ndërkohë, kompania “Andi SHPK”, mësohet se është në pronësi të Andi dhe Adriana Gjiknurit.

Në lejen e ndërtimit të afishuar në sheshin ku po zbatohet projekti ngjitur me plazhin në Jalë shihet qartë se si pronarë përcaktohen familjet Mëhilli dhe Dhespoti, ndërsa si kompani zhvilluese “Andi SHPK”.

Siç mund të shihet edhe nga afishimi i lejes së ndërtimit në sheshin ku po zbatohet projekti ngjitur me plazhin në Jalë, janë të afishuar si pronarë familjet Mëllihi dhe Dhespoti dhe si zhvillues Andi. SHPK.
Përfaqësuesit ligjorë të shtetasit Lorenc Koljaka sigurojnë se ky dokument gjendet edhe tek leja e ndërtimit që është lëshuar nga bashkia e Himarës në 11 qershor të vitit 2019. Lëshimi i lejes së ndërtimit në këtë datë, tregon se leja e ndërtimit është dhënë brenda më pak se 6 muajve që nga marrja e pronësisë përmes legalizimit.

E vetmja mënyrë për ta realizuar këtë ka qenë që tapitë e nevojshme të siguroheshin me shumë shpejtësi. Në datën 10 janar të vitit 2019, brenda ditës janë dhënë dy vendime legalizimi për kalimin e pronësisë të objektit të zotëruar nga zoti Koljaka. Vendimet mbajnë numrin 1 dhe 2 të vitit 2019.

Kujtojmë, që prona e pretenduar si e tjetërsuar gjendet në vijën e parë të plazhit, ndërkohë aktet mbajnë firmën e Ardian Mustës, drejtori i atëhershëm i ALUIZNI-t në Vlorë. Një ditë më pas, sipas dokumenteve me 11 janar 2019 edhe lëshuar vërtetmi hipotekor për të dyja lejet e legalizimit, me firmën e Klodian Trocit. Një personazh i njohur ky që u arrestua pak ditë më parë i dyshuar për falsifikimet me trojet po në Himarë, dhe ku në shtëpi gjatë kontrolleve ju gjetën rreth 60 mije euro CASH. Edhe në 2019 Troci u pezullua për shkeljet në hipotekë. Dyshimet mbi shpejtësinë e veprimit të administratës publike i ngre dhe avokati i zotit Koljaka, Rezart Kthupi.

Jala investmet është themeluar në 15 tetor 2020 me aksionerë 60% Andi.shpk dhe 40% AIG. Kjo kompani nënvizon se ka përfituar 3 pronat objekt zhvillimi, si kontribut në kapital nga një nga investitorët, shoqëria AIG sh.p.k. Pronat janë blerë në vitin 2020 nga shoqëria AIG (ortak i shoqërisë Jala Investment) sipas vërtetimeve të pronësisë të lëshuara nga kadastra e Vlorës dhe pa asnjë lloj barre hipotekore mbi to thuhet në deklaratë, ku shtohet se prej më shumë se 1 viti prona është zotëruar ligjërisht dhe fizikisht dhe nuk ka patur asnjë lloj pretendimi pronësie nga askush dhe jo më nga pretenduesit e pronës në këtë artikull.

Ndërkohë për pretendimet Lorenc Koljaka ka kallëzuar në prokurori, ish drejtorin e ALUIZNI-t në Vlorë Ardian musta, Kompaninë Jala Investment SHPK, dhe administratorin e kësaj shoqërie Saimir Boka. Koljaka parashtron në padi faktin se si janë lëshuar për të njëjtën ndërtesë dy leje të ndryshme legalizimi. Madje ndarja objektit është berë e barabartë, 48 metra për secilen nga familjet, Mëhilli dhe Dhespoti, në menyrë të barabartë është ndarë edhe oborri.

Jala investment thotë po ashtu se lidhja që bëhet në artikull mes aktivitetit të kësaj shoqërie dhe personave të tjerë publikë, është abuzive dhe synon thjesht mediatizimin e qëllimshëm të çështjes duke dëmtuar interesat e kompanisë.

Lidhja e kompanisë Andi.SHPK në pronësi të familjarëve të Damian Gjiknurit, mund të jetë thjesht rastësore me vetë Damian Gjiknurin, por nga ana tjetër fakti është se në procesin e legalizmit dhe hipotekimit janë përfshirë persona të rëndësishëm të administratës lokale, gjatë kohës kur përfaqësuesi i larte partiak ka qenë drejtues politik në Vlorë. Ndërkohë është pothuajse e pamundur që kta drejtues shtetërore lokale që, administrojnë llokma të rëndësishme pushteti të emërohen jashtë influencave politike.

Prona e zotit Koljaka ka qenë aty në regjistrat shtetërore thotë avokati i tij. Vërtetuar me aktet trashëgimise të leshuara ndër vite, me vertetimet e kryepleqësisë se fshatit Vuno të vitit 1993 dhe 1995, si dhe me lejen e përkohëshme të ndërtimit për riparimin e çatisë së objektit dhënë nga bashkia e Himarës në 2008. Avokati i Koljakës shtron pyetjen se si është e mundur që legalizmi i një objekti është bërë pa verifikuar situaten në terren, dhe pa u konsultuar me regjistrat publikë për statusin e pronës në fjalë.

Përcaktimi apo jo i veprës penale që ka të bëjë me ushtrimin e paligjshëm të funksioneve publike, korrupsionin apo shpërdorimin e detyrës duhet të vendoset nga organet e drejtësisë.