Bota rrezikon një “katastrofë morale” nëse vaksinimi kundër COVID-19 shtyhet në Afrikë derisa rajone më të pasura të vaksinojnë tërë popullsinë e tyre, paralajmëroi drejtori i Qendrave Afrikane për Kontrollin dhe Parandalimin e Sëmundjeve (CDC).
John Nkengasong tha se CDC shpreson që fushatat e mëdha të vaksinimit në Afrikë do të fillojnë në prill, raporton Reuters.
“Kjo është shumë larg duke qenë se ky virus transmetohet shumë shpejt”, tha ai, duke paralajmëruar që vala e dytë e sëmundjes në Afrikë ishte “kthyer e etur për hakmarrje”.
Numri i infeksioneve të reja u rrit javën e kaluar me pothuajse 19 përqind dhe numri i vdekjeve me 26 përqind, sipas CDC.
Afrika ka raportuar deri më tani 2.7 milion infeksione dhe 64,000 vdekje.
Afrika e Jugut, ku është zbuluar një variant i ri i virusit, ka konfirmuar 82,000 të infektuar në shtatë ditët e fundit, tha ai.
Disponueshmëria dhe financimi global i vaksinave janë pengesa kryesore për fillimin e vaksinimit në Afrikë, tha Nkengasong.
Ai paralajmëroi se kombet e pasura kanë blerë më shumë vaksina sesa duhen.
“Ne nuk duhet të kemi një krizë morale kur këto gjëra grumbullohen në botën e zhvilluar ndërsa ne në Afrikë e kemi të vështirë t’i marrim ato”, tha ai.
Bashkimi Afrikan po negocion me BE, Kanadanë dhe kompanitë farmaceutike për të siguruar vaksinën, përveç atyre që u janë premtuar atyre nën programin COVAX të OBSH.
COVAX është një skemë globale për të siguruar shpërndarjen e vaksinës në vendet e varfëra.
“Do të vijë lehtë në një katastrofë morale nëse nuk jemi të bashkuar për të filluar vaksinimin sa më shpejt të jetë e mundur në 2021 dhe për të ndihmuar Afrikën atje ku është e nevojshme,” tha ai.
Procesi i miratimit të vaksinave të ndryshme ka të ngjarë të përshpejtohet përmes një procesi qendror brenda Bashkimit Afrikan, vuri në dukje ai.
