Presidenti rus Vladimir Putin prezantoi për herë të parë kushtet e Rusisë për fillimin e negociatave të paqes dhe përfundimin e luftës në Ukrainë, por Kievi e refuzoi brenda vetëm pak orësh.
Duke folur në një takim me punonjësit e Ministrisë së Jashtme ruse në Moskë, Putin tha se Rusia do t’i japë fund “menjëherë” operacionet luftarake nëse Ukraina braktis synimin e saj për t’u bashkuar me NATO-n dhe të tërheqë trupat e saj nga rajonet e Donetsk, Luhansk, Kherson dhe Zaporizhia – katër rajone lindore të aneksuara nga Rusia në vitin 2022, një lëvizje që përgjithësisht nuk njihet nga komuniteti ndërkombëtar.
Putin vuri në dukje se ai propozon përfundimin e konfliktit, jo thjesht ngrirjen e tij.
“Sapo Ukraina të fillojë të tërheqë trupat nga Donbass dhe Novorossiya dhe të angazhohet të mos anëtarësohet në NATO, Federata Ruse do të pushojë zjarrin dhe do të jetë gati për negociata. Nuk mendoj se do të zgjasë shumë”, shtoi presidenti rus.
Putin përsëriti se ai nuk e konsideron Volodymyr Zelensky-n si president legjitim të Ukrainës pasi mandati i tij skadoi më 20 maj. Siç tha ai, ai e konsideron Verkhovna Rada-n, parlamentin kombëtar të Ukrainës, të vetmin autoritet legjitim.
Megjithatë, brenda pak orësh, Ukraina hodhi poshtë propozimin e Putinit për paqe.
“Nuk ka propozime të reja për paqe nga Rusia dhe udhëheqja ruse e ka vlerësuar në mënyrë joadekuate realitetin”, tha këshilltari i presidentit ukrainas Mihajlo Podoljak në rrjetin social X.
Presidenti ukrainas Volodymyr Zelensky tha se kushtet që Putin vendosi për përfundimin e luftës janë një “ultimatum” që nuk mund t’i besohet.
Sipas tij, të njëjtën gjë bënte dhe Hitleri.
“Besoj se Putini nuk do ta ndalë ofensivën e tij ushtarake edhe nëse kërkesat e tij plotësohen. Është e njëjta gjë që bënte Hitleri. Kjo është arsyeja pse ne nuk duhet t’u besojmë këtyre mesazheve”, tha Zelensky për kanalin italian të lajmeve SkiTG24.
Rusia filloi luftën më 24 shkurt 2022, për shkak të së cilës Ukraina shpalli gjendjen e jashtëzakonshme që nuk lejon mbajtjen e zgjedhjeve presidenciale.
Reagimi i Putinit erdhi një ditë pasi vendet e G7 njoftuan një paketë të re kredie prej 50 miliardë dollarësh për Ukrainën dhe ku Uashingtoni dhe Kievi nënshkruan një marrëveshje sigurie 10-vjeçare, duke vazhduar mbështetjen perëndimore për vendin për një kohë të pacaktuar.
