Askush nuk dëshiron lëkurë të thatë, të kuqe, apo të ketë kruajtje, por e vërteta është se 31.6 milionë njerëz vuajnë nga dermatiti atopik, ose i njohur si ekzema. Ndërkohë që nuk ka asnjë kurë për ekzemën aktualisht, ka shumë medikamente pa recetë, si dhe kremra të ndryshëm për të ndihmuar në uljen e inflamacionit të shkaktuar nga ekzema.
Por a ka vërtet një lidhje midis ekzemës dhe alergjive ushqimore?
Sipas Dr. Peter Lio, asistent profesor i dermatologjisë dhe pediatrisë në Universitetin Northëestern në Çikago, drejtor themelues i Qendrës Integrative të Ekzemës në Çikago, përgjigja është po.
Alergjitë ushqimore konsiderohen si një komorbiditet zyrtar (gjendje shëndetësore e lidhur) i dermatitit atopik së bashku me astmën, rinitin alergjik (ethet e barit) dhe depresionin. Studiuesit kanë zbuluar se deri në 30 për qind e njerëzve me AD gjithashtu kanë alergji ushqimore, tha Lio.
Për disa njerëz, ekspozimi ndaj një kikiriku të vetëm bëhet një urgjencë kërcënuese për jetën që mund të çojë në anafilaksi. Për të tjerët, ngrënia e disa ushqimeve si sheqeri, vezët ose bulmeti bën që lëkura e tyre të shpërthejë në një ekzemë të furishme.
Si rezultat, ata besojnë se nëse thjesht mund të heqin disa ushqime nga dieta e tyre, të tilla si gluten apo bulmet, ekzema e tyre do të largohet.
Fatkeqësisht, tha Lio, nuk është aq e thjeshtë. Pyetja nr. 1 që bëjnë pacientët e mi është ‘A mund të lidhet kjo me ushqimin?’ Dhe përgjigja ime në përgjithësi është kjo: ‘Do të doja të ishte!’
“Për pacientët që kanë dermatit herpetiformis (gjendja specifike e lëkurës që lidhet me sëmundjen celiac të shkaktuar nga një reagim specifik ndaj glutenit), shpesh është shumë e thjeshtë. Nëse shmangin glutenin, lëkura në përgjithësi mbetet e pastër. Por ne nuk jemi aq me fat për pacientët me ekzemë pasi ata, sipas përkufizimit, nuk e kanë këtë gjendje.” tha Lio.
Alergjitë ushqimore kundrejt ndjeshmërisë ushqimore
Për të kuptuar më mirë marrëdhënien midis ekzemës dhe dietës, është e dobishme të dimë dallimin midis alergjive ushqimore kundrejt ndjeshmërisë ose intolerancës ushqimore.
Ndjeshmëria ndaj ushqimit, ose intoleranca ushqimore, ndodh kur një person ka probleme me tretjen e ushqimeve të caktuara. Kjo mund të çojë në gazra, fryrje, dhimbje barku ose diarre, për shembull. Një alergji ushqimore, nga ana tjetër, provokon një reagim të sistemit imunitar që prek organe të shumta në trup dhe mund të shkaktojë një sërë simptomash, disa prej të cilave janë kërcënuese për jetën.
Ushqimet që ndihmojnë në reduktim të simptomave të ekzemës:
Ushqime të pasura me acide yndyrore Omega-3: Salmoni, ton, skumbri, sardelet. Këto ushqime mund të ndihmojnë në zbutjen e lëkurës së thatë që vjen me një shpërthim ekzeme.
Ushqimet që përmbajnë një nivel të lartë probiotikësh: kos, supë miso dhe tempeh. Ushqime dhe pije të tjera të fermentuara, si kefiri, kombucha dhe lakër turshi, mund të përmbajnë gjithashtu probiotikë. Nëse nuk jeni adhurues i ndonjë prej këtyre ushqimeve, mund të merrni në konsideratë marrjen e një suplementi probiotik! Disa të sëmurë nga ekzema kanë zbuluar se shtimi i probiotikëve në dietën e tyre ofron një lehtësim dhe reduktim të episodeve të shpërthimeve.
Perimet dhe frutat që janë të pasura me flavonoidë që luftojnë inflamacionin: mollët, brokoli, qershitë, boronica, spinaqi dhe lakra jeshile. Flavonoidet ndihmojnë në përmirësimin e shëndetit të përgjithshëm të lëkurës së një personi dhe luftojnë probleme të tilla si inflamacioni (i cili shoqërohet me ekzemën).
Perimet dhe frutat me përmbajtje të lartë të vitaminës C: speca zile, portokall, luleshtrydhe, lulelakër, ananasi dhe mango. Vitamina C është një antioksidant që ndihmon në mbrojtjen e trupit tuaj nga reagimet alergjike.
Ushqime me përmbajtje të lartë kaliumi: banane, avokado, kunguj , patate të ëmbla, fasule të bardha dhe salmoni. Kaliumi është një tjetër ushqim që lufton inflamacionin që mund të ndihmojë në reduktimin e simptomave të ekzemës.
Ushqimet që kanë vlera të larta mbrojtëse dhe ndërtuese të lëkurës: qepa e njomë (e pasur me vitaminë C), hikërror (i shkëlqyeshëm për ata me alergji), lëng mishi ose pule (siguron glicinë aminoacide që riparon lëkurën) dhe tërshërë (përmban vitaminë E dhe silicë).
Për të përcaktuar se cilat ushqime mund të shkaktojnë shfaqjen e ekzemës dhe kruajtje , provoni të eliminoni një nga ushqimet e zakonshme që shkaktojnë ekzemë për 14 ditë dhe më pas rifuteni atë në dietën tuaj për të parë nëse shkakton një reagim.
Disa ushqime të zakonshme që mund të shkaktojnë shpërthime janë: agrumet, qumështi, vezët, gruri/gluteni, soja, domatja dhe disa lloje arrash.
Nëse keni provuar të trajtoni ekzemën tuaj me produkte, duke shtuar/eliminuar ushqime dhe ende nuk keni rezultate ideale, duhet të konsultoheni me profesionistë të shëndetit.
