Policia vijon me intensitet kontrollet në kuadër të megaoperacionit “Territor i Pastër”, ku në Malësinë e Madhe është goditur një rast i kultivimit të bimëve narkotike.
Autoritet kanë sekuestruar 373 fidanë dhe bimë narkotike cannabis sativa, bimë narkotike në proces tharjeje dhe një sasi municioni luftarak.
Autori 46-vjeçar është identifikuar dhe po vijon puna për kapjen e tij.
Njoftimi i policisë:
Malësi e Madhe/Vijojnë me intensitet kontrollet në kuadër të megaoperacionit “Territor i pastër”.
Si rezultat i kontrolleve, goditet një rast i kultivimit të bimëve narkotike, në fshatin Gruemirë.
Sekuestrohen 373 fidanë dhe bimë narkotike cannabis sativa, bimë narkotike në proces tharjeje dhe një sasi municioni luftarak.
Identifikohet autori i dyshuar dhe vijon puna për kapjen e tij.
Si rezultat i kontrolleve të imtësishme në të gjithë territorin e qarkut dhe punës së inteligjencës policore, në kuadër të megaoperacionit “Territor i pastër”, shërbimet e Komisariatit të Policisë Malësi e Madhe, në fshatin Gruemirë, gjetën të mbjella 321 fidanë dhe 52 bimë narkotike. Gjithashtu, në këtë territor, në ambientet e objekti në pronësi të shtetasit P. C., u gjetën disa bimë narkotike në proces tharjeje dhe një sasi municioni luftarak, të cilat u sekuestruan në cilësinë e provës materiale.
Nga veprimet hetimore për këtë rast u identifikua dhe u shpall në kërkim autori i dyshuar, shtetasi P. C., 49 vjeç. Vijon puna për kapjen e tij dhe për dokumentimin e plotë të kësaj veprimtarie kriminale.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër.
